শুল্ক যুদ্ধৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে এইবাৰ গাজাত ‘শান্তি ব’ৰ্ড’ৰ মঞ্চলৈ ভাৰতক আমন্ত্ৰণ জনাইছে। চৰকাৰী সূত্ৰৰ উদ্ধৃতি দি এই কথা প্ৰকাশ কৰিছে সংবাদ সংস্থা পিটিআইয়ে। ট্ৰাম্পে প্ৰধানমন্ত্ৰী নৰেন্দ্ৰ মোদীলৈ লিখা পত্ৰখন ছ’চিয়েল মিডিয়াত প্ৰকাশ কৰে ভাৰতত থকা আমেৰিকাৰ নৱনিযুক্ত ৰাষ্ট্ৰদূত চাৰ্জিঅ’ গোৰে।
দেওবাৰে মাৰ্কিন ৰাষ্ট্ৰপতিয়ে গাজাত ‘শান্তি ব’ৰ্ড’ৰ মঞ্চত যোগদান কৰিবলৈ ভাৰতলৈ আনুষ্ঠানিক আমন্ত্ৰণ প্ৰেৰণ কৰে। পত্ৰখনত তেওঁ লিখিছে, “পশ্চিম এছিয়াৰ শান্তি শক্তিশালী কৰাৰ লক্ষ্যৰে গাজাত শান্তি আৰু নিৰাপত্তা নিশ্চিত কৰাৰ এই আন্তঃৰাষ্ট্ৰীয় পদক্ষেপলৈ ভাৰতৰ প্ৰধানমন্ত্ৰী হিচাপে আপোনাক আমন্ত্ৰণ জনাইছোঁ।” ট্ৰাম্পে পত্ৰখনত নিজৰ পৰিকল্পনাৰ ৰূপৰেখা দাঙি ধৰিছে। অৱশ্যে এই বিষয়ত ভাৰতৰ বৈদেশিক পৰিক্ৰমা মন্ত্ৰালয়ৰ পৰা এই পৰ্যন্ত কোনো সঁহাৰি পোৱা নাই।
ভাৰতৰ সমান্তৰালকৈ আমেৰিকাই পাকিস্তানকো জড়িত কৰিব বিচাৰিছে। এই সন্দৰ্ভত পাকিস্তানৰ প্ৰধানমন্ত্ৰী শ্বাহবাজ শ্বৰীফকো আমন্ত্ৰণ জনাইছে ট্ৰাম্পে। এই দাবী ইছলামবাদৰ। যোৱা বছৰৰ অক্টোবৰ মাহত ইজিপ্তত অনুষ্ঠিত হৈছিল ‘গাজা শান্তি সন্মিলন’। পাকিস্তানৰ প্ৰধানমন্ত্ৰী শ্বাহবাজক তাত নিমন্ত্ৰণ কৰা হৈছিল। মোদীকো নিমন্ত্ৰণ কৰা হৈছিল। অৱশ্যে সেই সময়ত তেওঁ মিচৰলৈ যোৱা নাছিল। তাৰ পৰিৱৰ্তে ভাৰতৰ বৈদেশিক পৰিক্ৰমা ৰাজ্যিক মন্ত্ৰী কীৰ্তি বৰ্ধন সিঙক মোদীৰ দূত হিচাপে ইজিপ্তলৈ প্ৰেৰণ কৰা হয়। সেই শান্তি সন্মিলনতো শ্বাহবাজে ট্ৰাম্পক প্ৰশংসা কৰিছিল।
গাজাত শান্তি ঘূৰাই অনাৰ বাবে ট্ৰাম্পে গঠন কৰিছে ‘শান্তি ব’ৰ্ড’। তেওঁ নিজেই এই আন্তঃৰাষ্ট্ৰীয় মঞ্চৰ মুৰব্বী বুলি ঘোষণা কৰিছে। শনিবাৰে ‘নিউয়ৰ্ক টাইমছ’ৰ বাতৰি অনুসৰি আমেৰিকাই ইতিমধ্যে কেইবাখনো দেশৰ ৰাষ্ট্ৰপতিক এই ব’ৰ্ডৰ সদস্য হ’বলৈ আমন্ত্ৰণ জনাইছে। আৰ্জেণ্টিনা, কানাডা, ইজিপ্ত আৰু তুৰস্ক – এই চাৰিখন দেশে ইতিমধ্যে দাবী কৰিছে যে, তেওঁলোকে ট্ৰাম্পৰ আমন্ত্ৰণ লাভ কৰিছে।
শনিবাৰে হোৱাইট হাউছে কয় যে- ‘শান্তি ব’ৰ্ড’ত কূটনীতি, উন্নয়নমূলক কাম আৰু অৰ্থনীতিৰ অভিজ্ঞতা থকা নেতাসকল অন্তৰ্ভুক্ত কৰা হৈছে। কোৱা হয় যে- গাজাত শান্তি পুনৰুদ্ধাৰৰ এই আন্তঃৰাষ্ট্ৰীয় পদক্ষেপলৈ প্ৰায় ৬০খন দেশৰ ৰাষ্ট্ৰপতিক আমন্ত্ৰণ জনোৱা হৈছে।
