বাণিজ্যিক আৰু ঔদ্যোগিক গ্ৰাহকসকলৰ বাবে এক ডাঙৰ সকাহ দি তেল বিপণন কোম্পানীসমূহে ১৯ কেজিৰ বাণিজ্যিক LPG চিলিণ্ডাৰৰ দাম ১৮৩.৫০ টকা কৰ্তন কৰিছে। পশ্চিম এছিয়াত উত্তেজনা হ্ৰাস পোৱাৰ পিছত বাণিজ্যিক LPG যোগানৰ ওপৰত থকা সকলো খণ্ডভিত্তিক নিষেধাজ্ঞা প্ৰত্যাহাৰ কৰাৰ চৰকাৰী সিদ্ধান্তৰ পিছতে ১ জুলাইৰ পৰা কাৰ্যকৰী হোৱাকৈ এই সংশোধিত দৰ নিৰ্ধাৰণ কৰা হৈছে।
এই শেহতীয়া দাম হ্ৰাসৰ পিছত দিল্লীত এটা বাণিজ্যিক চিলিণ্ডাৰৰ দাম পূৰ্বৰ ৩,১১৩.৫০ টকাৰ পৰা ২,৯৩০ টকালৈ হ্ৰাস পাব। ইয়াৰ উপৰিও তেল বিপণন কোম্পানীসমূহে ৫ কেজি ওজনৰ ফ্ৰী ট্ৰেড LPG (FTL) চিলিণ্ডাৰৰ দামো ১৩ টকা হ্ৰাস কৰিছে, যাৰ ফলত দিল্লীত ইয়াৰ খুচুৰা দাম ৮০৮.৫০ টকা হৈছেহি। অৱশ্যে ঘৰুৱা ব্যৱহাৰৰ LPG চিলিণ্ডাৰৰ দামত কোনো পৰিৱৰ্তন কৰা হোৱা নাই।
পেট্ৰ’লিয়াম মন্ত্ৰালয়ে LPG যোগান সম্পূৰ্ণৰূপে সংকটৰ পূৰ্বৰ অৱস্থালৈ ঘূৰাই অনাৰ পিছতেই এই দাম হ্ৰাসৰ সিদ্ধান্ত আহে।
ইৰাণক কেন্দ্ৰ কৰি চলি থকা সংঘাতৰ চৰম পৰ্যায়ত বিশ্বৰ শক্তি বজাৰে তীব্ৰ মাধমাৰ খাইছিল। ঘৰুৱা বজাৰখন সুৰক্ষিত কৰিবলৈ ভাৰত চৰকাৰে পূৰ্বে অত্যাৱশ্যকীয় সামগ্ৰী আইন (Essential Commodities Act) প্ৰয়োগ কৰিছিল। ইয়াৰ অধীনত C3-C4 হাইড্ৰ’কাৰ্বন ব্যৱহাৰ কেৱল LPG উৎপাদনৰ বাবেহে বাধ্যতামূলক কৰা হৈছিল আৰু পেট্ৰ’কেমিকেল উদ্যোগৰ পৰা ইয়াক আঁতৰাই অনা হৈছিল। সংকটৰ আৰম্ভণিতে সম্পূৰ্ণৰূপে স্থগিত ৰখা বাল্ক LPG যোগান জুন মাহত ৫০ শতাংশলৈ শিথিল কৰা হৈছিল আৰু এই মাহত ইয়াক সম্পূৰ্ণৰূপে পুনৰুদ্ধাৰ কৰা হয়।
ব্যৱসায়িক আৰু বাণিজ্যিক গ্ৰাহকসকলৰ বাবে এই দাম হ্ৰাস এক ডাঙৰ সকাহ হিচাপে পৰিগণিত হৈছে, যিসকলে বিগত কেইবামাহো ধৰি ইন্ধনৰ আকাশলংঘী দামৰ বোজা বহন কৰিবলগীয়া হৈছিল। পশ্চিম এছিয়াৰ সংঘাত আৰম্ভ হোৱাৰ পূৰ্বে এটা ১৯ কেজিৰ বাণিজ্যিক চিলিণ্ডাৰৰ দাম আছিল প্ৰায় ১,৮১৪ টকা, কিন্তু যোগানৰ অনিশ্চয়তাৰ বাবে ইয়াৰ দাম ৩,১০০ টকাৰ ওপৰলৈ বৃদ্ধি পাইছিল।
বাণিজ্যিক খণ্ডই এই মাহত সকাহ লাভ কৰিছে যদিও ঘৰুৱা উপভোক্তাসকলে এতিয়াও পূৰ্বৰ দাম বৃদ্ধিৰ বোজা বহন কৰিবলগীয়া হৈছে; যোৱা জুন মাহত ১৪.২ কেজিৰ ঘৰুৱা চিলিণ্ডাৰৰ দাম ২৯ টকা বৃদ্ধি কৰা হৈছিল, যাৰ ফলত দিল্লীত ইয়াৰ খুচুৰা দাম ৯৪২ টকা হৈছিলগৈ।
