কেন্দ্ৰীয় চৰকাৰৰ কৰ্মচাৰী আৰু পেঞ্চনাৰসকলৰ বাবে সুখবৰ। প্ৰধানমন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত কেন্দ্ৰীয় মন্ত্ৰীসভাৰ বৈঠকত মৰগীয়া বানচ (DA) আৰু মৰগীয়া সকাহ (DR) ৩ শতাংশ বৃদ্ধি কৰাৰ সিদ্ধান্ত গ্ৰহণ কৰা হৈছে। ২০২৬ চনৰ ১ জুলাইৰ পৰা কাৰ্যকৰী হোৱাকৈ এই বৃদ্ধি অনুমোদন জনোৱা হৈছে।
এই সিদ্ধান্তৰ ফলত কেন্দ্ৰীয় চৰকাৰৰ কৰ্মচাৰীসকলৰ মৰগীয়া বানচ মূল দৰমহাৰ ৬০ শতাংশৰ পৰা ৬৩ শতাংশলৈ বৃদ্ধি পাব। একেদৰে, পেঞ্চনাৰসকলৰ মৰগীয়া সকাহো মূল পেঞ্চনৰ ৬০ শতাংশৰ পৰা ৬৩ শতাংশলৈ বৃদ্ধি কৰা হৈছে।
কেন্দ্ৰীয় চৰকাৰৰ এই সিদ্ধান্তৰ ফলত দেশৰ প্ৰায় ৪৮.৫৪ লাখ কৰ্মৰত কৰ্মচাৰী আৰু ৬৮.৭১ লাখ পেঞ্চনাৰকে ধৰি মুঠ প্ৰায় ১.১৭ কোটি লোক উপকৃত হ’ব।
এই বৰ্ধিত মৰগীয়া বানচ আৰু সকাহ প্ৰদানৰ ফলত কেন্দ্ৰীয় চৰকাৰৰ ৰাজকোষৰ পৰা বছৰি অতিৰিক্ত ১০,০১৬.১০ কোটি টকা ব্যয় হ’ব বুলি চৰকাৰী সূত্ৰই প্ৰকাশ কৰিছে।
উল্লেখযোগ্য যে, সপ্তম কেন্দ্ৰীয় দৰমহা আয়োগৰ পৰামৰ্শৰ আধাৰত নিৰ্ধাৰিত সূত্ৰ অনুসৰি এই বৃদ্ধি কৰা হৈছে। মুদ্ৰাস্ফীতিৰ ফলত অত্যাৱশ্যকীয় সামগ্ৰীৰ মূল্য বৃদ্ধিৰ বোজা কিছু পৰিমাণে লাঘৱ কৰাৰ উদ্দেশ্যে চৰকাৰে সাধাৰণতে বছৰত দুবাৰকৈ মৰগীয়া বানচ আৰু মৰগীয়া সকাহৰ হাৰ সংশোধন কৰে।
এই সিদ্ধান্তই আগন্তুক দীপাৱলীৰ পূৰ্বে কেন্দ্ৰীয় চৰকাৰৰ কৰ্মচাৰী আৰু পেঞ্চনাৰসকলৰ বাবে আৰ্থিক সকাহ কঢ়িয়াই আনিব বুলি আশা কৰা হৈছে।
