এটা চকলেটৰ বাবে ভাৰত পালেহি বাংলাদেশৰ কিশোৰ। তেওঁ পকেটত বাংলাদেশী ১০০ টকাৰ এটা মুদ্ৰা লৈয়ে বাংলাদেশৰ কুমিল্লাৰ পৰা ত্ৰিপুৰাৰ কমলচোৱা গাঁৱৰ এখন দোকানলৈ আহিছিল। তেওঁ এখন নদী পাৰ হৈ সীমান্তৰক্ষীৰ চকুত ধুলি মাৰি কাটা তাৰ পাৰ হৈ এক দীঘলীয়া যাত্ৰাপথ আতিক্ৰম কৰি ভাৰতত প্ৰৱেশ কৰে কিশোৰজন। তেওঁল লক্ষ্য মাত্ৰ এটাই চকলেট। কেৱল এটা প্ৰিয় চকলেটৰ বাবেই বাংলাদেশৰ পৰা ভাৰত পালেহি কিশোৰজন। বাংলাদেশত নোপোৱা চকলেট ক্ৰয় কৰিবৰ বাবেই ভাৰতলৈ অহা কিশোৰজনে এতিয়া সকলোৰে দৃষ্টি কাঢ়িছে।
এই যুৱকজনৰ নাম হৈছে ইমান হোছেইন। চকলেটৰ প্ৰতি থকা হেঁপাহৰ বাবে ভাৰতলৈ অহা ইমান অবশেষত BSF জোৱানৰ হাতত ধৰা পৰে। BSF জোৱানৰ প্ৰশ্নৰ উত্তৰত ইমানে কয়, ‘চকলেট কিনাৰ বাহিৰে মোৰ কোনো উদ্দেশ্য নাই।’ পিছে তেওঁৰ কথাত পতিয়ন নগ’ল সীমান্তৰক্ষী। ইমানক গতাই দিয়ে আৰক্ষীক। আৰু পৰৱৰ্তী সময়ত তেওঁক আদালতত হাজিৰ কৰোৱা হয় আৰু বেআইনিভাৱে সীমান্ত অতিক্ৰম কৰাৰ অপৰাধত এটা গোচৰ ৰুজো কৰা হয়। অৱশেষত ১৫ দিনৰ বাবে কাৰাগাৰেই হৈ পৰে ইমানৰ বাবে ঘৰ।
এই প্ৰসংগত আৰক্ষীয়ে কয় যে, ‘ইমানৰ ভাৰতলৈ অহাৰ কাৰণ আছে নে নাই তাক লৈ বৰ্তমান অনুসন্ধান চলি আছে। অৱশ্যে, অনুসন্ধানত ১০০ টকাৰ বাংলাদেশী মপদ্ৰাৰ বাহিৰে আন একো পোৱা নাই কিশোৰজনৰ পৰা। উপয়ুক্ত নথিপত্ৰ অবিহনে ভাৰতত প্ৰৱেশ কৰাৰ বাবে তেওঁক গ্ৰেপ্তাৰ কৰা হৈছে।’