গুৱাহাটীৰ ২৫০খন শিক্ষানুষ্ঠানে গুৱাহাটী পৌৰ নিগমক বহু বছৰ ধৰি কৰ ফাঁকি দি আহিছে। বাৰম্বাৰ জনোৱাৰ পিছতো বহু শিক্ষানুষ্ঠানে কেৰেপ কৰা নাই প্ৰশাসনৰ আহ্বান। আন বিদ্যালয়বোৰৰ লগতে নুনমাটিস্থ অসম জাতীয় বিদ্যালয়ৰ নামো কৰ ফাঁকি দিয়া বিদ্যালয়ৰ তালিকাত থকাৰ কথা একাংশ সংবাদ মাধ্যমত প্ৰচাৰ হৈছিল। অসম জাতীয় বিদ্যালয়ৰ সচিব ডাঃ নাৰায়ণ শৰ্মাই এক প্ৰেছ বিজ্ঞপ্তিযোগে জনাইছে যে অসম জাতীয় বিদ্যালয়ে আৰম্ভণিৰে পৰাই গুৱাহাটী পৌৰ নিগমক নিয়মীয়াকৈ কৰ পৰিশোধ কৰি আহিছে। চলিত বিত্তীয় বৰ্ষৰ ৩১ মাৰ্চ ২০২২ লৈকে দিবলগীয়া পৌৰ নিগমৰ কৰো গুৱাহাটী পৌৰ নিগমৰ বিল নং ৩১৩৬৭৫০ৰ বিপৰীতে ৰছিদ নং ৭২১১৩৭ যোগে ১৩ আগষ্ট ২০২১ত পৌৰ নিগমৰ কাৰ্যালয়ত জমা দিয়া হৈছে। অসম জাতীয় বিদ্যালয়ৰ সচিব ডাঃ নাৰায়ণ শৰ্মাই সদৰি কৰিছে এই কথা।
