জাপানত অনুষ্ঠিত এছিয়ান গেমছ ২০২৬ৰ সপ্তম দিনটোত ভাৰতীয় দললৈ আহিল দুটাকৈ ৰূপৰ পদক। পুৰুষৰ মাৰাথনত সাৱন বাৰৱালে ৰূপৰ পদক জয় কৰি এছিয়ান গেমছৰ মাৰাথনত ৪৪ বছৰৰ পিছত ভাৰতক পদক আনি দিলে। ২ ঘণ্টা ১১ মিনিট ৩৭ ছেকেণ্ডত দৌৰ সম্পূৰ্ণ কৰি ব্যক্তিগত শ্ৰেষ্ঠ প্ৰদৰ্শনেৰে দ্বিতীয় স্থান লাভ কৰে সাৱন বাৰৱালে।
ইফালে, শ্বুটিঙতো ভাৰতীয় দলটোৱে ৰূপৰ পদক অৰ্জন কৰে। তিলোত্তমা সেন, বিদৰ্শা বিনোদ কোচালুমকাল আৰু আছি চৌকছিয়ে মহিলাৰ ৫০ মিটাৰ ৰাইফল ৩ পজিচন দলীয় ইভেণ্টত ৰূপৰ পদক দখল কৰে।
এই দুটা ৰূপৰ পদকৰ সৈতে এছিয়ান গেমছ ২০২৬ত ভাৰতৰ মুঠ পদকৰ সংখ্যা ২৫টালৈ বৃদ্ধি পাইছে। ইয়াৰ ভিতৰত আছে ২টা সোণ, ১১টা ৰূপ আৰু ১২টা ব্ৰঞ্জৰ পদক।
পদকৰ দৌৰত ভাৰতীয় খেলুৱৈসকলৰ ধাৰাবাহিক প্ৰদৰ্শনে আগন্তুক দিনকেইটাত দেশবাসীৰ আশা অধিক বৃদ্ধি কৰিছে।
