বিশিষ্ট সাহিত্যিক অৰুণ গোস্বামীৰ দেহাৱসান। ঔপন্যাসিক, স্তম্ভ লেখক, ৰাজনৈতিক বিশ্লেষক হিচাপে খ্যাতি আছিল গোস্বামীৰ। ৮২ বছৰ বয়সত যোৰহাটৰ খ্ৰীষ্টান হাস্পতালত দেহাৱসান সাহিত্যিকজনৰ। বিভিন্ন সময়ত বিজ্ঞান মনস্কতাৰ ওপৰত গোস্বামীয়ে আৰোপ কৰিছিল গুৰুত্ব। তথাকথিত ধৰ্মীয় গণ্ডীৰ পৰা দূৰৈত আছিল তেওঁৰ চিন্তাধাৰা। মৃত্যুৰ পিছত নিজৰ শৰীৰ দান কৰি থৈ গৈছে অৰুণ গোস্বামীয়ে। টেলিভিছনৰ পৰ্দাতো গোস্বামী আছিল এক সবল কণ্ঠ। বৰ্ণবাদৰ বিৰুদ্ধে সজোৰে যুক্তি ৰাখিছিল গোস্বামীয়ে। তেওঁৰ একাধিক গ্ৰন্থ জনমানসত সমাদৃত। তেওঁৰ ‘মাছমৰীয়া ছোৱালীৰ লাজ’ নামৰ গ্ৰন্থখনৰ কাহিনীৰে নিৰ্মাণ হৈছে চিনেমাও। মঞ্জু বৰাই নিৰ্মাণ কৰিছিল ‘লাজ’ নামৰ প্ৰশংসিত ছবিখন। অৰুণ গোস্বামীৰ দেহাৱসানত ৰাজ্যৰ সুধী সমাজত শোকৰ ছাঁ।
