মধ্যপ্ৰদেশৰ বিদিশা জিলাত সংঘটিত হৈছে এক শোকাৱহ ঘটনা। তিনিমহলীয়া অট্টালিকাৰ বাৰান্দাৰ পৰা গুটখাৰ পিক পেলাবলৈ যাওঁতেই ১১ হাজাৰ ভল্টৰ উচ্চ ক্ষমতাসম্পন্ন বিদ্যুৎ পৰিবাহী তাঁৰৰ সংস্পৰ্শলৈ আহি এজন ৬৫ বছৰীয়া লোকৰ মৃত্যু হোৱা বুলি প্ৰকাশ পাইছে।
প্ৰকাশিত বাতৰি অনুসৰি, মৃত লোকজনৰ নাম প্ৰভুলাল গুপ্তা। তেওঁ পেছাত এজন ৰাজমিস্ত্ৰী আছিল আৰু মধ্যপ্ৰদেশৰ গঞ্জবাছোদাৰ গায়ত্ৰী নগৰৰ এটা ভাড়াঘৰত প্ৰায় ১০ বছৰ ধৰি বাস কৰি আহিছিল।
যোৱা শুকুৰবাৰে দুপৰীয়া প্ৰায় ১ বজাত তেওঁ ঘৰৰ তিনিমহলীয়া বাৰান্দাত থিয় হৈ গুটখা খোৱাৰ পিছত পিক পেলাবলৈ যাওঁতে এই দুৰ্ঘটনা সংঘটিত হয়। বাৰান্দাৰ নিচেই কাষেৰে পাৰ হৈ যোৱা ১১ কিলোভল্টৰ বিদ্যুৎ পৰিবাহী তাঁৰৰ সংস্পৰ্শলৈ অহাৰ ফলত তেওঁ গুৰুতৰভাৱে বিদ্যুৎস্পৃষ্ট হয়। পিছত তেওঁক চিকিৎসালয়লৈ নিয়া হয় যদিও চিকিৎসকে মৃত ঘোষণা কৰে।
ইফালে, এই ঘটনাক কেন্দ্ৰ কৰি অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে। স্থানীয় বাসিন্দাসকলে অভিযোগ কৰা অনুসৰি, আৱাসিক অঞ্চলৰ ঘৰৰ নিচেই কাষেৰে পাৰ হৈ যোৱা উচ্চ ক্ষমতাসম্পন্ন বিদ্যুৎ পৰিবাহী তাঁৰসমূহ স্থানান্তৰ কৰাৰ বাবে পূৰ্বেও সংশ্লিষ্ট কৰ্তৃপক্ষক অনুৰোধ জনোৱা হৈছিল। কিন্তু সেই অভিযোগসমূহৰ পিছতো প্ৰয়োজনীয় ব্যৱস্থা গ্ৰহণ কৰা নহ’ল বুলি তেওঁলোকে দাবী কৰিছে।
এই শোকাৱহ ঘটনাই পুনৰ এবাৰ আৱাসিক অঞ্চলত উচ্চ ক্ষমতাসম্পন্ন বিদ্যুৎ পৰিবাহী তাঁৰ স্থাপনৰ সুৰক্ষা আৰু ৰক্ষণাবেক্ষণক লৈ গুৰুত্বপূৰ্ণ প্ৰশ্নৰ উত্থাপন কৰিছে।
