চীনৰ ৰাষ্ট্ৰপতি শ্বি জিনপিঙৰ সন্মানত বৃহস্পতিবাৰে হোৱাইট হাউছত আমেৰিকাৰ ৰাষ্ট্ৰপতি ড’নাল্ড ট্ৰাম্পে আয়োজন কৰা ষ্টেট ডিনাৰত উপস্থিত থাকিল বিশ্বৰ কেইবাগৰাকীও ধনকুবেৰ, ৱাশ্বিংটনৰ প্ৰভাৱশালী ব্যক্তি আৰু আগশাৰীৰ ব্যৱসায়ী। অতিথিৰ তালিকাৰ পৰা আৰম্ভ কৰি তেওঁলোকৰ সাজ-পোছাক, কোনে ক’ত বহিব, নিশাটোত তেওঁলোকৰ আচৰণ আৰু আনকি ভোজৰ মেনুলৈকে—কূটনীতিৰ এই আড়ম্বৰপূৰ্ণ দিশটোৱেই বিশেষ চৰ্চা লাভ কৰে।
চীনৰ ৰাষ্ট্ৰপতি শ্বি জিনপিঙৰ সন্মানত আমেৰিকাৰ ৰাষ্ট্ৰপতি ড’নাল্ড ট্ৰাম্পে হোৱাইট হাউছত আয়োজন কৰা ষ্টেট ডিনাৰত উপস্থিত থাকিল বিশ্বৰ আগশাৰীৰ কেইবাগৰাকীও প্ৰযুক্তি উদ্যোগপতি। অতিথিৰ তালিকাত আছিল Amazonৰ প্ৰতিষ্ঠাপক জেফ বেজ’ছ, Tesla আৰু SpaceXৰ CEO ইলন মাস্ক, Google আৰু Alphabetৰ CEO সুন্দৰ পিচাই, OpenAIৰ সভাপতি তথা সহ-প্ৰতিষ্ঠাপক গ্ৰেগ ব্ৰকমেন আৰু Dell Technologiesৰ অধ্যক্ষ তথা CEO মাইকেল ডেল। এপলৰ টিম কুক, এনভিডিয়াৰ জেনছেন হুয়াং আৰু OpenAIৰ ছেম অল্টমেন, Metaৰ মাৰ্ক জাকাৰবাৰ্গকে আদি কৰি বহুকেইজন প্ৰযুক্তি জগতৰ শীৰ্ষ ব্যক্তি।
বাণিজ্য আৰু কৃত্ৰিম বুদ্ধিমত্তা (AI) যে শ্বি জিনপিঙৰ আমেৰিকা ভ্ৰমণৰ অন্যতম গুৰুত্বপূৰ্ণ বিষয়, সেয়া এই অতিথিৰ তালিকাই স্পষ্ট কৰিছে। দিনটোৰ আৰম্ভণিতে সামৰিক কুচকাৱাজ, বিমান বাহিনীৰ উৰণ প্ৰদৰ্শন আৰু হোৱাইট হাউছৰ নতুন হেলিপেড পৰিদৰ্শনকে ধৰি বিভিন্ন কাৰ্যসূচীৰে শ্বিক আদৰণি জনায় ট্ৰাম্পে।
ষ্টেট ডিনাৰত ট্ৰাম্পে আমেৰিকা আৰু চীনৰ মাজত বিভিন্ন মতাদৰ্শগত পাৰ্থক্য থাকিলেও দুয়োখন দেশৰ জনসাধাৰণৰ মাজৰ সম্পৰ্ক অটুট আছে বুলি মন্তব্য কৰে। আনহাতে, শ্বি জিনপিঙে দুয়োখন দেশক শান্তিপূৰ্ণভাৱে সহাৱস্থান কৰিবলৈ আহ্বান জনোৱাৰ লগতে চীন আৰু আমেৰিকাই দায়িত্বশীল বৃহৎ দেশ হিচাপে কাম কৰিব লাগিব বুলি কয়।
ইফালে, ট্ৰাম্প আৰু শ্বি জিনপিঙৰ বৈঠকৰ সময়ত বাণিজ্য, AI, টাইৱান আৰু ইৰান যুদ্ধকে ধৰি কেইবাটাও গুৰুত্বপূৰ্ণ বিষয় আলোচনালৈ আহে। শ্বিয়ে AI সদায় মানুহৰ নিয়ন্ত্ৰণত থাকিব লাগিব বুলি মন্তব্য কৰাৰ লগতে টাইৱানৰ স্বাধীনতাৰ বিৰোধিতা কৰিবলৈ ট্ৰাম্পক আহ্বান জনায়। ইৰানৰ যুদ্ধ আলোচনাৰ জৰিয়তে যিমান সোনকালে সম্ভৱ সমাপ্ত কৰাৰ বাবেও তেওঁ আহ্বান জনায়।
ষ্টেট ডিনাৰত ট্ৰাম্পে শ্বি জিনপিঙক আমেৰিকাৰ ৰাষ্ট্ৰীয় প্ৰতীক ব’ল্ড ঈগলৰ এটা বিশেষভাৱে নিৰ্মিত মূৰ্তি উপহাৰ হিচাপে আগবঢ়ায়।
অৱশ্যে হোৱাইট হাউছৰ বাহিৰত শ্বি জিনপিঙৰ বিৰুদ্ধে প্ৰতিবাদো অনুষ্ঠিত হয়। প্ৰতিবাদকাৰীসকলে ‘Xi Jinping is not welcome’ আৰু ‘Free Hong Kong’ আদি শ্লোগান দিয়ে।
বাণিজ্যিক ক্ষেত্ৰত দুয়োখন দেশৰ মাজত চলি থকা বিৰতি আৰু দুমাহ, অৰ্থাৎ জানুৱাৰীলৈ বৃদ্ধি কৰাৰ সিদ্ধান্তক বৈঠকৰ অন্যতম ফলাফল হিচাপে গণ্য কৰা হৈছে। অৱশ্যে চীনে আশা কৰা দুবছৰীয়া বাণিজ্যিক বিৰতিৰ তুলনাত এই সময়সীমা যথেষ্ট কম।
আজি শ্বি জিনপিঙৰ আমেৰিকা ভ্ৰমণৰ সামৰণি পৰিব। আজি তেওঁ আৰু তেওঁৰ পত্নী পেং লিয়ুয়ানে ট্ৰাম্প আৰু তেওঁৰ পত্নী মেলানিয়াৰ সৈতে আমেৰিকাৰ ৰাষ্ট্ৰীয় আৰ্কাইভছ পৰিদৰ্শন কৰিব।
ফাৰ্ষ্ট লেডী মেলানিয়া ট্ৰাম্পে সন্ধিয়াৰ ভোজৰ মেনু প্ৰস্তুত কৰাত সহায় কৰিছিল। ৰ’নাল্ড ৰেগানৰ ৰাষ্ট্ৰপতিত্বৰ সময়ৰ ৰেড চায়না ডিনাৰ ছেটত অতিথিসকলক এই বিশেষ মেনু পৰিৱেশন কৰা হয়। ড’নাল্ড ট্ৰাম্পৰ ষ্টেট ডিনাৰৰ মেনুত আছিল য়েলো স্কোৱাছ ভেল’টে, য’ত বনৰীয়া কাঠফুলা, সতেজ বনৌষধি, ক্ৰিস্পি পেনচেটা আৰু স্কেলিয়ন অইল ব্যৱহাৰ কৰা হৈছিল। ইয়াৰ পিছত অতিথিসকলক পৰিৱেশন কৰা হয় তিলৰ আৱৰণযুক্ত ছী বেছ, ব্ৰেইজড বেবী বক চয়, ৰোষ্ট কৰা গাৰ্ডেন এগপ্লাণ্ট আৰু ছ’চ ভেৰ্টে। ডেজাৰ্ট হিচাপে আছিল ভেনিলা ক্ৰেমু’, ছ’ৰ চেৰী কনফি আৰু ৱালনাট ফ্ৰেঞ্জিপেনৰ সৈতে। ইয়াৰ লগতে হোৱাইট হাউছৰ মৌৰে প্ৰস্তুত কৰা আইচক্ৰীমো পৰিৱেশন কৰা হয়।
