মহিলা এদিনীয়া বিশ্বকাপৰ খিতাপ জয় কৰাৰ পাছত ভাৰতীয় মহিলা দলৰ খেলুৱৈসকলৰ চকুলো বৈছিল। টিম ইণ্ডিয়াই এই মুহূৰ্তৰ বাবে দীৰ্ঘদিন ধৰি অপেক্ষা কৰি আছিল। খেলুৱৈসকলৰ উপৰিও আন এজন ব্যক্তিয়ে এই মুহূৰ্তৰ বাবে অপেক্ষা কৰি আছিল। সেই ব্যক্তিজন আছিল দলৰ মুখ্য প্ৰশিক্ষক অমল মজুমদাৰ, যিয়ে কেতিয়াও ভাৰতীয় দলৰ জাৰ্চি পিন্ধা নাই, কিন্তু তেওঁ সেই কাম কৰি দেখুৱালে, যিটো দেশৰ বাবে খেলা খেলুৱৈসকলেও কৰিব পৰা নাই। টিম ইণ্ডিয়াক বিশ্ব চেম্পিয়ন বনোৱাত মুম্বাইৰ এই পূৰ্বৰ ৰঞ্জী খেলুৱৈজনৰ গুৰুত্বপূৰ্ণ অৱদান আছে।
অমল মজুমদাৰে কেনেকৈ সলনি কৰিলে দলৰ ভাগ্য?
ভাৰতীয় মহিলা দল এদিনীয়া বিশ্বকাপৰ ফাইনেলত ২০০৫ আৰু ২০১৭ চনত উপনীত হৈছিল, কিন্তু কেতিয়াও চেম্পিয়ন হ’ব পৰা নাই। এইবাৰ টিম ইণ্ডিয়াৰ ইচ্ছা আছিল বেলেগ। অমল মজুমদাৰৰ প্ৰশিক্ষণত মহিলা দলে ইতিহাস ৰচিলে আৰু ৫২ বছৰীয়া সপোন বাস্তৱায়িত কৰিলে। ভাৰতীয় মহিলা দলৰ মুখ্য প্ৰশিক্ষক অমল মজুমদাৰৰ বাবে এই কাম কৰাটো সহজ নাছিল। তেওঁ খেলুৱৈসকলৰ সৈতে কঠোৰ পৰিশ্ৰম কৰিলে। খেলুৱৈসকলৰ দুৰ্বলতাসমূহ দূৰ কৰিলে আৰু তেওঁলোকৰ ভিতৰত জয়ৰ উৎসাহ জগাই তুলিলে।
২০২৩ চনত হৈছিল প্ৰশিক্ষক
ভাৰতীয় দলত সুযোগ নোপোৱাত হতাশ অমল মজুমদাৰে ২০১৪ চনত ক্ৰিকেটৰ পৰা অৱসৰ গ্ৰহণ কৰাৰ পাছত প্ৰশিক্ষণৰ পথ বাছি ল’লে। তেওঁ নেদাৰলেণ্ডছ, দক্ষিণ আফ্ৰিকা আৰু ৰাজস্থান ৰয়েলছৰ দৰে দলৰ সৈতে কাম কৰিছিল। এই সময়ছোৱাত তেওঁৰ পৰিচয় গঢ় লৈ উঠিল এনে এজন প্ৰশিক্ষকৰ সৈতে, যিয়ে কম কথা কয়, কিন্তু প্ৰতিটো কথাকে গভীৰভাৱে বুজি পায়।
২০২৩ৰ অক্টোবৰত তেওঁক ভাৰতীয় মহিলা দলৰ মুখ্য প্ৰশিক্ষক নিযুক্ত কৰা হৈছিল। সেই সময়ত বহুতে প্ৰশ্ন উত্থাপন কৰিছিল যে, যিয়ে দেশৰ বাবে কেতিয়াও খেলা নাই, তেওঁ কেনেকৈ প্ৰশিক্ষক হ’ব?
ফাইনেলত দক্ষিণ আফ্ৰিকাৰ বিৰুদ্ধে জয়ৰ পাছত দলৰ খেলুৱৈসকলে উদযাপন কৰিলে, কিন্তু অমল মজুমদাৰ নীৰৱে থিয় হৈ আছিল। তেওঁ কোনো উদযাপন কৰা দেখা পোৱা নগৈছিল। তেওঁৰ বাবে এয়া কেৱল জয় নহয় বৰঞ্চ তেওঁৰ সপোন আছিল। আন্তৰ্জাতিক ক্ৰিকেট খেলিবলৈ সুযোগ নোপোৱা অমলৰ অনুশোচনাই ভাৰতীয় মহিলা দলক বিশ্ব চেম্পিয়ন বনালে।
অমল মজুমদাৰে ১৯৯৩ চনত মুম্বাই দলৰ পৰা নিজৰ প্ৰথম শ্ৰেণীৰ কেৰিয়াৰ আৰম্ভ কৰিছিল। দুটা দশকতকৈও অধিক দীঘলীয়া কেৰিয়াৰত অমল মজুমদাৰে ১৭১খন প্ৰথম শ্ৰেণীৰ মেচত ১১,০০০ৰো অধিক ৰান সংগ্ৰহ কৰিছিল। এই সময়ছোৱাত তেওঁ ৩০টা শতক অৰ্জন কৰিছিল, কিন্তু কেতিয়াও টিম ইণ্ডিয়াৰ বাবে এখনো মেচ খেলিব পৰা নাছিল।
তেওঁ অন্ধ্ৰ, অসম, মুম্বাই আৰু ইণ্ডিয়া A আদি বিভিন্ন দলৰ হৈ খেলিছিল। তেওঁ আছিল মুম্বাইত শচীন তেণ্ডুলকাৰৰ সতীৰ্থ।
নৱী মুম্বাইৰ ডিৱাই পাটিল ষ্টেডিয়ামত ফাইনেলৰ আটাইতকৈ স্মৰণীয় ছবিখন তেতিয়া প্ৰকাশ পাইছিল যেতিয়া হৰমনপ্ৰীত কৌৰে অমল মজুমদাৰৰ ভৰি চুইছিল আৰু তাৰ পাছত তেওঁক আলিঙ্গন কৰিছিল। এই দৃশ্যই তেওঁৰ প্ৰতি থকা হৰমনপ্ৰীতৰ সন্মান প্ৰকাশ পাইছিল।
মেচৰ অন্তত অধিনায়ক হৰমনপ্ৰীতে প্ৰশিক্ষক অমলৰ বিষয়ে কয় যে, ছাৰৰ অৱদান বিগত ২ বছৰত অসাধাৰণ আছিল। তেওঁৰ আগমনৰ পাছত সকলো ভালদৰে চলিবলৈ আৰম্ভ কৰিলে। তেওঁ আমাক দিনে-ৰাতিয়ে অনুশীলন কৰাইছিল, যি উন্নতিৰ প্ৰয়োজন আছিল তাৰ ওপৰত গুৰুত্ব দিছিল। মই সঁচাকৈয়ে সুখী যে আমি তেওঁৰ পৰা প্ৰশিক্ষণ লাভৰ সুযোগ পাইছিলোঁ।
