সোমবাৰে নিশা আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণ আৰু ইজৰাইলৰ মাজত যুদ্ধবিৰতিৰ ঘোষণা কৰে। তেতিয়া ভাৰতীয় সময়ত মাজনিশা ৩-৩০ বাজিছিল। ইৰাণ বা ইজৰাইলৰ পৰিৱৰ্তে ট্ৰাম্পে প্ৰথমে এই সংঘৰ্ষবিৰতিৰ কথা ঘোষণা কৰে, ঠিক যেনেকৈ ভাৰত-পাকিস্তানৰ সংঘৰ্ষবিৰতিৰ ক্ষেত্ৰত হৈছিল। ঘটনাক্ৰমে, সোমবাৰৰ দিনটো আছিল পশ্চিম এছিয়াৰ বাবে এক ঘটনাবহুল নিশা। ট্ৰাম্পৰ সামাজিক মাধ্যমৰ পোষ্টৰ পাঁচ ঘণ্টাৰ পূৰ্বে ইৰাণে পশ্চিম এছিয়াত আমেৰিকাৰ এটা সামৰিক ঘাটি লক্ষ্য কৰি আক্ৰমণ চলায়। পশ্চিম এছিয়াৰ বিভিন্ন দেশে এই আক্ৰমণৰ নিন্দা জনায়।
ইৰাণৰ পৰমাণু কেন্দ্ৰত আমেৰিকাৰ আক্ৰমণৰ পিছৰে পৰা তেহৰানে ৱাশ্বিংটনক বাৰে-বাৰে হুংকাৰ দি আহিছিল। পশ্চিম এছিয়াত আমেৰিকাৰ সামৰিক ঘাটিসমূহ নিৰাপদ নহয় বুলিও ইৰাণৰ হুংকাৰত ইংগিত পোৱা গৈছিল। এনে পৰিস্থিতিত আমেৰিকাই লেবাননৰ পৰা তুলনামূলক কম গুৰুত্বপূৰ্ণ চৰকাৰী বিষয়া আৰু তেওঁলোকৰ পৰিয়ালক স্থানান্তৰ কৰিবলৈ আৰম্ভ কৰে। লেবানন পশ্চিম এছিয়াৰ এটা গুৰুত্বপূৰ্ণ দেশ। লেবাননৰ এটা অংশত ইৰাণৰ সমৰ্থিত সশস্ত্ৰ গোষ্ঠী হিজবুল্লাহৰ উপস্থিতি আছে। এই উত্তেজনাৰ মাজতে ইজৰাইলী সেনাই তেহৰানৰ সাধাৰণ নাগৰিকক স্থানান্তৰৰ বাবে সতৰ্ক কৰি দিয়ে। সোমবাৰে নিশা তেহৰানতো আক্ৰমণ হয়। এই নিশা উত্তেজনা কমাৰ কোনো লক্ষণ দেখা নগ’ল।
এই সময়ত সোমবাৰ নিশা প্ৰায় ১০-৩০ বজাত ইৰাণে কাটাৰৰ আল উদেইদত আমেৰিকাৰ বায়ুসেনাৰ ঘাটিত আক্ৰমণ চলায়। এই ঘাটিটো কাটাৰৰ ৰাজধানী দোহাৰ পৰা মাত্ৰ ৩২ কিলোমিটাৰ দূৰত্বত অৱস্থিত। আক্ৰমণৰ পিছত লেবানন, ছৌদি আৰৱৰ দৰে দেশৰ পৰা প্ৰতিক্ৰিয়া আহিবলৈ ধৰে, য’ত এই আক্ৰমণৰ নিন্দা কৰা হয়। তথাপিও ইৰাণ শান্ত নহ’ল। ইৰাণৰ সামৰিক বাহিনীয়ে জনায় যে, আমেৰিকাৰ পৰমাণু কেন্দ্ৰত আক্ৰমণৰ প্ৰতিশোধ ল’বলৈ এই আক্ৰমণ চলোৱা হৈছে আৰু নতুন আক্ৰমণ হ’লে তাৰো প্ৰত্যুত্তৰ দিয়া হ’ব।
কিন্তু ট্ৰাম্পে এই আক্ৰমণক গুৰুত্ব নিদিলে। ইৰাণৰ আক্ৰমণৰ প্ৰায় তিনি ঘণ্টা পিছত তেওঁ সামাজিক মাধ্যমত পোষ্ট কৰে। তেওঁ ইৰাণৰ আক্ৰমণক ‘দুৰ্বল’ বুলি বৰ্ণনা কৰে আৰু জনায় যে, ইৰাণৰ পৰা এনে দুৰ্বল পদক্ষেপৰেই আশা কৰা হৈছিল। তেওঁ কয় যে, ইৰাণে মুঠ ১৪টা ক্ষেপণাস্ত্ৰ নিক্ষেপ কৰিছিল, তাৰে ১৩টা ধ্বংস কৰা হৈছে। এটা ক্ষেপণাস্ত্ৰ খালি ঠাইত পৰিছিল। ট্ৰাম্পৰ দাবী, এই আক্ৰমণত কোনো আমেৰিকান বা কাটাৰৰ নাগৰিক আহত হোৱা নাই।
গুৰুত্বপূৰ্ণভাৱে তেওঁ পোষ্টটোত লিখে, “মই ইৰাণক ধন্যবাদ জনাব বিচাৰো কাৰণ তেওঁলোকে আমাক আগতীয়াকৈ জনাইছিল। ফলত কোনো হতাহত হোৱা নাই। হয়তো এইবাৰ ইৰাণে আঞ্চলিক শান্তি আৰু সম্প্ৰীতিৰ দিশত আগবাঢ়িব পাৰে। ইজৰাইলকো মই একে কথাই ক’ম।” কিন্তু ট্ৰাম্পে পিছত এই পোষ্টৰ কোনো ব্যাখ্যা নিদিলে। ফলত ইৰাণে ‘জনাইছিল’ বুলি তেওঁ কি বুজাব বিচাৰিছিল, সেয়া স্পষ্ট নহ’ল।
ইৰাণক ‘ধন্যবাদ’ জনোৱা এই পোষ্টৰ দুঘণ্টা পিছত ট্ৰাম্পে ইৰাণ আৰু ইজৰাইলৰ মাজত সংঘৰ্ষবিৰতিৰ ঘোষণা কৰে। কিন্তু এই সংঘৰ্ষবিৰতি কিমান ফলপ্ৰসূ হৈছে, তাৰ ওপৰত এতিয়াও সন্দেহ আছে। আমেৰিকাৰ দাবী, এই সংঘৰ্ষবিৰতি কাৰ্যকৰী কৰাত কাটাৰেও সহায় কৰিছে। আমেৰিকাই কাটাৰক ইৰাণৰ সৈতে কথা পাতিবলৈ অনুৰোধ কৰিছিল। কাটাৰক জনোৱা হৈছিল যে, আমেৰিকাই ইজৰাইলক ইতিমধ্যে ৰাজি কৰাই লৈছে। তাৰ পিছত কাটাৰে ইৰাণৰ সৈতে কথা পাতি এই সফলতা লাভ কৰে বুলি ৱাশ্বিংটনে দাবী কৰে।
কিন্তু ইৰাণে মঙলবাৰ পুৱা ট্ৰাম্পৰ সংঘৰ্ষবিৰতিৰ ঘোষণাক অগ্ৰাহ্য কৰি জনায় যে কোনো সংঘৰ্ষবিৰতিৰ চুক্তি হোৱা নাই। চূড়ান্ত সংঘৰ্ষবিৰতিৰ সিদ্ধান্ত ইৰাণৰ সামৰিক বাহিনীয়ে পিছত ল’ব। তাৰ পিছত মঙলবাৰ পুৱাও ইৰাণ আৰু ইজৰাইলে ইজনৰ বিৰুদ্ধে সিজনৰ ওপৰত আক্ৰমণৰ অভিযোগ উত্থাপন কৰিছে। ইৰাণৰ ক্ষেপণাস্ত্ৰ আক্ৰমণত ইজৰাইলত চাৰিজনৰ মৃত্যুৰ খবৰ পোৱা গৈছে। আনহাতে, ইৰাণেও দাবী কৰিছে যে, তেওঁলোকৰ ৯জনৰ মৃত্যু হৈছে। ট্ৰাম্পৰ ঘোষিত যুদ্ধবিৰতিত ইজৰাইলে সম্মতি জনাইছে। কিন্তু এই প্ৰতিবেদন প্ৰকাশৰ সময়লৈকে ইৰাণৰ অৱস্থান স্পষ্ট হোৱা নাই।
